#17 Frau Fasnacht

Frau Fasnacht, Sie als Expärtin: Wenns scho wieder rasant richtig Fasnacht zuegoht, s Fasnachtsfieber eim in Uffregig versetzt, den foht me jo maischtens aa überall Parallele z finde au dert wo me kaini würdi vermuete…
Jo dasch korräggt. Es foht harmlos a, me verwäggslet dr Termin vom Ypfiffe mit em letschte Heimspiel im Kaländer, isst Faschtewaie statt Banane vor em Match. Denn so in dr letschte Wuche vor dr Fasnachts wird’s allewyl absurd und dr eint oder die ander verwäggslet Nervosität vorem Match mitme stargge Fasnachtsfieber, Dr Pauggischt in dr Halle wird Guggemusikant, me meint im quiitsche vo de Schuehsoole e paar fini Piccolotön z erkenne, und dr Puls isch allewyyl gfärglig hoch. D Loge vom Baizli intrigiert mitm Schiri, wies e richtigi Waageclique wurd mache, d Finger sin wund vom Harz oder de Drummelschlegel und s Trikot wird schnäll zum Goschdym wo me all joor wieder aalegt… Aber verruggt wird’s wenn d Buebe in de Katakombe stöhn und warte bi si uff dr Blatz dörfe und me dänngt dass das jo e kli öpis vom warte uff e Morgestraich het, well jedi und jede so konzentriert isch, parat und wartet druff biss s Glöggli lütet oder s ändligg heisst «Achtung Morgestraich vorwärts Marsch»!

Was wünsche Si em TVB für d’ NLB-Spiel gege Gossau und Horge vo däre Wuche?
Ich wünsch mir, ass es d Buebe lön lo krache, wie d Tambuure wo ruesse bis zum letschte Fünferruef, dass jede Pass wie d Orange vomene Waggis akunnt, e Kampf lebändig, e chly verruggt, aber höggschd fokussiert isch! Gege Gossau bruucht’s e gueti Portion Geduld, warte bis dr Stau am Cortège sich ufflöst. Dr Rhythmus us em letschte Spiel gege Gänf mitnäh und wenn sich Lugge ergänn sich duuredrugge wie e glaine Gnopf uff dr Jagd nach Dääfeli…Und falls eimol ein vo dene Oschtschwizer oder e Zürcher ohni Blagedde vor em Nüünmeterkreis stoht wie bstellt und nid abgholt, denn zuepacke wie dr Waggis bim Räpplisack.

D’Fasnacht läbbt jo vom Nochwuggs und vo aktive Lüt. Wo gsehn Si Parallele zem Sport in dr Region Basel?
E Clique ohni Jungi und Binggis funktioniert genau so wenig, wie e Handball-Verein ohni Noochwuggs. Es stoht und fallt mit em Umfäld wo alles ermöglicht, d Latärnemooler wo schöni Helge moole oder fotigrafiere, d Wirteteam vom Käller oder Beizli, d Kreisläufer, d Bänggler, e Tambourmajor wo denn alles zämmebringt und notürlig die wo sich löhn begeistere und allzeit bereit sinn zum ko luege, klatsche und stuune. Fasnacht und Sport hänn s glyche Gmiet: e Mischig us Liideschaft, Lokalstolz und em unzerstörbare Glaube, dass s näggscht Joor oder d Zuekunft no sott besser wärde! Also Herre! Vill Erfolg bi dene zwei Spiel und denne wünsch ich uns allne, drey wundervolli scheenschti Dääg! Und villicht entdeckt me no s eint oder andere Harzdepot am Drummelküssi, e Taktikdääfeli uffem Waage oder spöter denn Räppli in de Halleschueh…

Ob Vorträäbler, Pfyffer, Tambour, Major, Zugbegleiter, Güggeler oder Wäägeler; Antygge, Bebbi, BMGler, Gundeli, Junteressli, Naarebaschi, Olymper, OnyValer, Rolli, Rootsherre, Ruesser, Stainlemer, Querschleeger, Bastarde, Fuege Fäger, Unschlyssigi und wär i vergässe ha: TVBler uffd Gass!

Euri Frau Fasnacht